علاش درنا هاد الكتاب؟

بحال جميع الآباء،  ندمنا بزاف على أننا ما تعلمناش القرآن فصغرنا, بحكم قدرة الحفظ والاستيعاب كاتكون كبيرة بزاف فداك العمر. فطفولتنا، تعلمنا القرآن بطرق تقليدية، اللي رغم أهميتها، ما كانتش كتخلينا  نتواصلو مع القرآن وتخلق واحد الرابطة روحية بيننا وبين كتاب الله. تمنينا كون كانت شي طريقة جديدة ومختالفة. طريقة تخلي حفظ القرآن سهل وممتع أكثر لينا.

منين كنا صغار، كانو كيحفضونا القرآن بطريقة حسينا بأنها بعيدة، رسمية، وفي بعض الأحيان محبطة, بحال اللوحة فالجامع. رغم أن الجميع كان كيعرف أهمية القرآن، ولكن الطرق التقليدية كانت كاتصعب علينا نرتابطو بالقرآن بشكل حقيقي, حسينا بيه واجب كثر من أنه امتياز. وأنه كاينة شي حاجة ناقصة، حاجة كان يمكن تعاونا كثر نبغيو نحفضو  القرآن.

فهمنا أن الطرق التقليدية لتعليم القرآن، رغم أنها مفيدة، ما كتناسبش مع طريقة تعلم الأطفال اليوم. الحفظ بالذاكرة، الضغط باش نتعلمو بسرعة خلانا مانعرفوش الأهمية والجمال ديال القرآن. حنا كآباء، ما بغيناش ولادنا يمروا بنفس التجربة.

هادشي علاش قررنا نغيرو الطريقة اللي كيتعلمو بها ولادنا القرآن. بغينا نصممو مصدر ماشي غير كيعلم القرآن، ولكن كيخلق ارتباط أعمق مع التعاليم ديالو. بغينا نعلمو الأطفال بطريقة ممتعة، تفاعلية، وعندها معنى. طريقة كتزيد من فضولهم، كتقوي إيمانهم، وكتخليهم يتشوقو يتعلمو كل نهار.

فبعد أشهر من البحث والتشاور مع علماء وخبراء في تربية الأطفال، وبعد الإطلاع على العديد من الدراسات والكتب المهتمة بتعليم الأطفال القراءة والحفظ باكرا من بينها كتاب "how to teach your baby to read" للكاتب "glenn doman". عرفنا أن أفضل طريقة اللي تخلي الأطفال يحفضو بالزربة خاصها تضمن ثلاث مكونات أساسية:

• التركيز على الذاكرة البصرية والحسية إلى جانب السمعية كايساعد بشكل كبير في ثبات المعلومة.
• التفاعل ديال الأطفال اللي كايخليهوم مشاركين فعملية الحفظ عوض مايكونو مستمعين فقط.
• وأهم حاجة الاستمتاع ديال الطفل خلال الحصة ديال القراءة والحفظ.

لهذا حنا فخورين باش نقدمو لكم هاد الكتاب, اللي مصمم بهدف واحد: هو باش يخلي تعلم وحفظ القرآن ممتع، شيق، وعندو معنى لولادنا. مع أنشطة ورسومات كاتشد انتباه الأطفال وكاتحفزهم على التعلم والاندماج مع الآيات.

كانآمنو أن أحسن طريقة باش يتعلمو ولادنا القرآن ماشي غير عن طريق الحفظ فقط، ولكن عن طريق الفهم والارتباط. هاد الكتاب مصمم باش يخلق ارتباط دائم بين ولادنا والقرآن الكريم، ويخليهم يقدِرو الجمال والحكمة اللي فيه, وكيحفزهوم باش يتفاعلو مع التعاليم الرائعة من خلال القصص، الأنشطة، والرسومات، هادشي لي كايخلي التعلم والحفظ تجربة ممتعة ليهم.

بغينا نقدمو ليكم هاد الكتاب كفرصة لتغيير طريقة تعلم ولادكم للقرآن. خليوهم يعيشوا تجربة فريدة من نوعها، ويحسوا بحب وتقدير لهذا الكتاب العظيم من صغرهم وما يدوزوش نفس المعاناة. هاد الكتاب غادي يخلق ليهم ارتباط قوي مع القرآن ويشجعهم على فهم معانيه.